ភ្នំពេញ៖ សហព័ន្ធកីឡាចំបាប់កម្ពុជា ថ្មីៗនេះបានប្រកាសពីការតែងតាំងគ្រូបង្វឹកថ្មី ដែលជាអតីតអត្តពលិកម្ចាស់មេដាយមាសកីឡាចំបាប់ ក្នុងព្រឹត្តិការណ៍កីឡាអូឡាំពិក ទីក្រុងឡុងដ៍ ឆ្នាំ២០១២។ បើតាមការបង្ហោះរូប​ភាពស្វាគមន៍លើគណនីហ្វេសប៊ុករបស់លោក ខេស៊ី បាណេត គ្រូបង្វឹកថ្មីដែលសហព័ន្ធកីឡាចំបាប់កម្ពុជាទើបប្រកាសតែងតាំងនេះគឺលោក Komeil Ghasemi វ័យ៣៣ឆ្នាំ ជាជនជាតិអ៊ីរ៉ង់។

គួរបញ្ជាក់ថា ការតែងតាំងគ្រូបង្វឹកថ្មីនេះ ត្រូវបានលោក ខេស៊ី បាណេត ជាអនុប្រធានសហព័ន្ធកីឡាចំបាប់បញ្ជាក់ថា គឺជាការត្រៀមខ្លួនឱ្យបានប្រសើរមុនការចូលមកដល់នូវព្រឹត្តិការណ៍កីឡាស៊ីហ្គេម ឆ្នាំ២០២២ នៅប្រទេសវៀតណាម ជាពិសេសការត្រៀមខ្លួនឱ្យបានល្អបំផុតសម្រាប់ស៊ីហ្គេម ឆ្នាំ២០២៣ នៅកម្ពុជា ត្បិតសហព័ន្ធមានគោលដៅក្នុងការបំបែកកំណត់ត្រាឈ្នះមេដាយច្រើនបំផុត ដើម្បីបំបែកកំណត់ត្រាចាស់នៅស៊ីហ្គេម ២០១៣ ក្នុងប្រទេសមីយ៉ាន់ម៉ា។ គួររំឮកថា ក្នុងស៊ីហ្គេម ២០១៣ នៅមីយ៉ាន់ម៉ា កម្ពុជាឈ្នះបានមេដាយចំនួន ៨ ដែលរួមមានមេដាយមាស ៤ មេដាយប្រាក់២ និងមេដាយសំរឹទ្ធ ២។

ដោយឡែក មកចាប់អារម្មណ៍ពីសមាសភាពថ្មីនៃគ្រូបង្វឹកសហព័ន្ធកីឡាចំបាប់ លោក Komeil Ghasemi ឯណេះវិញ បុរសកំពស់ ១.៨៣ម៉ែត្ររូបនេះ ធ្លាប់ឈ្នះមេដាយមាស ក្នុងព្រឹត្តិការណ៍កីឡាអូឡាំពិក ទីក្រុងឡុងដ៍ ឆ្នាំ២០១២ និងឈ្នះមេដាយប្រាក់  ក្នុងព្រឹត្តិការណ៍កីឡាអូឡាំពិក ទីក្រុង Rio ឆ្នាំ២០១៦ រួមជាមួយមេដាយមាស និងមេដាយប្រាក់ជាច្រើនផ្សេងទៀត ក្នុងការប្រកួតកម្រិតពិភពលោក ក៏ដូចជានៅក្នុងព្រឹត្តិការណ៍កីឡាអាស៊ី ឬ Asian Game ផងដែរ៕